2024 оны 2-р сард болсон Нүүдлийн зүйлийн тухай конвенцын талуудын 14 дүгээр хуралд (CMS COP14) Тоодог шувууд олны анхаарлын төвд байлаа. Зохион байгуулагч Узбекистан улс Самарканд дахь “Торгоны зам” хурлын төвд байрлах нэгэн өрөөгөө Тоодогоор нэрлэж, төв танхимдаа селфи авах цэг байршуулснаас гадна үндэсний нээлтийн ёслолын видео бичлэгтээ Хонин Тоодогийг дурдаж хүндэтгэл үзүүлэв.
Швейцарын Шувуу судлалын хүрээлэнгийн дэмжлэгтэйгээр Евро-азийн тоодог судлалын холбоо, Унгар улсын Хөдөө аж ахуйн яам хамтран зохион байгуулсан “Тоодог хамгаалах олон улсын хамтын ажиллагаа” сэдэвт арга хэмжээ нь Оролцогч талуудын хурлын хамгийн олон хүн оролцсон арга хэмжээний нэг байлаа. Австри, Унгар, Энэтхэг, Иран, Казахстан, Монгол, Пакистан, Узбекистан гэсэн найман улсын төлөөлөл Тоодог шувууг хамгаалах хил дамнасан хүчин чармайлтын талаар илтгэл тавьжээ.
Энэ удаагийн CMS COP14 нь Евро-азийн тоодог судлаачдын холбооны Тоодог хамгаалах талаар арга хэмжээ, хэлэлцүүлгийг удирдан зохион байгуулж буй дөрөв дэх хурал юм. Өмнө нь ихэнх хүмүүс Тоодог шувууны талаарх ойлголтгүй байдаг байсан бол өдгөө эдгээр шувууд ландшафтын тогтвортой менежментийн бэлгэдэл болж, хамгаалах арга хэмжээ нэн шаардлагатай байгаа зүйлүүдийн тоонд зүй ёсоор тооцогдох болжээ
